My Writing (Poem - Hindi)

Yeh kaisa astra hai,
Yeh kaisa shastra hai.
Haath mein hai hathiyaar kyun,
Vinaash mein kyun tu vyast hai.

Hathiyaar chod, utha kalam,
Shastra chod, aur kha kasam
Na maaroonga, na kaatonga,
Na ujaadoonga, na bantoonga,

Na hoga katl-e-aam,
Na bahega lahoo,
Na hoga bacha yateem,
Na hogi vidhwa bahu,

Astra chod, auzaar utha,
Tu kuch naya bana,
Bane hue ko mat tod,
Toote hue ko phir jod.

Utha kalam, hal, kainchi, aari,
Khatam kar apni darindagi, apni laachari,
Khatam kar de yudh ki yeh beemari,
Duniya mein la khushhaali.

Kaam kar, tu kaam kar,
Atyachaari ka kaam tamaam kar,
Dikha de kisi se na tu kam hai,
Teri himmat mein itna dum hai.

Yeh kaisa astra hai,
Yeh kaisa shastra hai.
Haath mein hai hathiyaar kyun
Kyun vinaash mein tu vyast hai

Ladna hai to laachaari pe kar vaar,
Maarna hai to bhukhmari ko maar,
Kaatna hai to gareebi ko kaat,
Lootna hai to logon ke ghum loot,
Taaki unke paas sirf khushi jaaye choot.

Virodh kar, sangharsh kar
Tark kar, vitark kar
Sawaal kar, soch kar, vichaar kar,
Nafrat chod bas tu pyaar kar.
Apni akal se kaam le,
Dharm ke liye na jaan de, na jaan le.

Yeh bhoomi hai teri,
Yeh aasman hai tera,
Tu kisi ka ghulaam nahin,
Sabko ko yeh khula paigaam hai tera

Kisi se na tu yunhi darr,
Unke atyachar se bhidne de apna hunar,
Vaar ki jagah dushman se pyaar kar,
Pyaar se tod de atyachariyon ki kamar.

Yesh kaisa astra hai,
Yeh kaisa shastra hai,
Haath mein hai hathiyar kyun,
Kyun vinaash mein tu vyast hai.

Yeh Jadu Nahin To Kya Hai